Iñigo Urkullu Lehendakariak, Emakundeko zuzendari Izaskun Landaida alboan zuela, Urola Garaia Emakumeen Etxea bisitatu du gaur goizean. Bertan harrera egin diete Jon Luqui Albisuak, Urretxuko Alkateak, eta Koldobike Olabide Huelgak, Urola Garaia Mankomunitateko lehendakariak.

Emakumeen Etxea bisitatu ostean bilera bat egin dute, non Urola Garaia Emakumeen Etxea proiektua aurkeztu dieten. Bertan azaldu diete 2012an sortutako Ahalduntze Eskola izan zela proiektu honen  aurrekaria. Ondoren, Urola Garaiako Berdintasunerako II Planean zehaztu zen eskola Emakumeen Etxe batean bihurtzeko helburua. Honekin, abian zeuden ahalduntze prozesuak indartzeaz gain, emakume eta gizonen berdintasunerako beste behar estrategikoei erantzun ahal izateko.  Finkatutako helburu estrategiko nagusiak dira: emakumeen ahalduntze pertsonal, sozial eta politikorako baldintzak sortzea eta emakumeen eragin eta partehartze politikoa indartzea.

EMAKUMEEN ETXEAK

Emakumeen etxeak, emakumeentzako espazio propioak, mugimendu feministaren aldarrikapen historiko bat dira. Espazio propio horien bidez, emakumeen parte-hartze politiko eta soziala bultzatu, beren ahalduntzea sustatu, emakumeen eta emakume-talde ezberdinen arteko sinergiak sortu, hausnarketa kritikoa eta kontzientzia feminista bultzatzen dira. Ahalduntze indibidual, kolektibo eta sozialerako espazio propioa dira Emakumeen Etxeak. Beren mendekotasunaren kontzientzia indibiduala hartu eta, halaber, talde gisara bizitzako arlo ezberdinetan emakumeek pairatzen duten bereizkeriaren inguruko kontzientzia komuna hartzeko gune bat. Egun martxan daude Emakumeen Etxeak Donostia, Eibar, Hernani, Arrasate, Azpeitia, Basauri, Ondarroa, Ermua eta Durangon; beste hainbat herri eta hiritan sortze prozesuan daude edota Ahalduntzerako Eskolak daude.